Bybel-Media skenk 400 boeke aan plase in Wellington

“Bybel-Media help ons om nie net brood vir die lyf te gee nie, maar ook vir die siel.”

Só sê Evelyn van Wyk, lid van die evangelisasiespan Ambassadors of Christ Ministries (ACM), oor Bybel-Media (BM) se skenking van sowat 400 boeke op 13 Junie aan plaasgemeenskappe in die Wellington-omgewing.

Van Wyk, wat die nood op die plaasgemeenskappe in die Wellington-omgewing eerstehands beleef, het vir Bybel-Media, met wie sy reeds jare lank ’n verbintenis het, vir skenkings van Christelike literatuur gekontak. Van Wyk vertel verder: “Terwyl ons vir die mense op die plase kos geneem het, het ons begin dink hoe ons die mense meer betrokke by Jesus kan kry. En dáárom het ek vir Bybel-Media gekontak,” sê van Wyk.

William Ross, wat die boeke namens BM uitgedeel het, sê dit gee hom ’n warm gevoel om die uitdrukkings van dankbaarheid op die mense se gesig te sien. “Dis goed om vir mense kos te gee, maar twee uur later is die mense weer honger en dan gee die boeke vir die mense die geleentheid om met God te praat. Wanneer hulle van die gesprekke met die mense vergeet het, herinner God hulle deur die boeke dat Hy lief vir hulle is en dat sy genade genoeg is,” sê Ross.

Van Wyk voeg by dat sy die Here prys oor dié skenking van BM. “Wat so wonderlik van hierdie boeke is, is dat ’n mens met ’n klein groepie mense kan gaan sit en die boek deurwerk. Die mense kry die geleentheid om aantekeninge te maak, te sê hoe hulle oor die betrokke onderwerp voel en dan kan ons vir hulle bid. Wanneer ons weg ry is dit is so ’n seën om te sien hoe die mense steeds sit en uit die boeke lees,” sê Van Wyk.

Evelyn van Wyk en haar evangelisasiespan Ambassadors of Christ Ministries, probeer elke Saterdag soveel as moontlik mense op die plase in die Wellington-omgewing met brood vir die liggaam en vir die siel bedien. Hiér help William Ross, werknemer by Bybel-Media, die evangeliesasiespan om boeke, wat deur BM geskenk is, aan die plaaswerkers op die Mofoshala-plaas net buite Wellington, uit te deel.

Aftelkalender se begin  - Nina Müller van Velden

Met die aankondiging van die landwye grendeltyd het Nina Müller van Velden grappenderwys op sosiale media genoem dat sy vir haar ’n aftelkalender wil maak om die (aanvanklike) 21 dae van inperking dag ná dag af te merk, amper soos die Adventkalenders wat in Kerstyd gebruik word.

Nico Simpson, Uitvoerende Hoof van Bybel-Media, het Nina die volgende dag gekontak en hulle het gedagtes gewissel oor die moontlikheid van so ’n aftelkalender. Die hoofdoel van die kalender sou wees om gelowiges in hulle geloof te ondersteun terwyl almal by die huis moes bly.

Nina se rol in die span wat die Aftelkalender op die been gebring het, was om die voorbiddingstasie se simbool en gebedsvoorstelle te ontwerp. Na aanleiding van die terugvoering wat die span oor die kalender ontvang het, vertel Nina, het sy besef dat hierdie projek mense help om hulle geloof prakties by die huis uit te leef en God se teenwoordigheid in dié onseker tyd te ervaar. Sy is opgewonde dat die skuif na “geloof aanlyn” mense nooi om met nuwe oë hulle gebedsoefening uit te leef, en dat “kerk” eintlik op enige plek kan plaasvind.

Nina het in die noordelike voorstede van Kaapstad grootgeword. Ná skool het sy jeugwerk aan die Hugenote Kollege in Wellington gaan studeer, en daarna teologie by die Universiteit Stellenbosch. Sy en haar man, Wouter, was klasmaats en het in 2011 getrou. Nina het in 2018 haar PhD in die Nuwe Testament voltooi en is tans besig met postdoktorale navorsing in Bybelwetenskappe. Nina se tuisgemeente is NG Kerk Parke in die noordelike voorstede.

Nina en haar man, Wouter.

Nina Müller van Velden wat aan die Aftelkalender werk.

Julle stories: Annadene Malan

Annadene Malan is ’n vierdejaarstudent wat Bewaringsekologie aan die Universiteit Stellenbosch studeer. Sy het op KiesKerk.com afgekom toe sy maniere gesoek het om met haar medegelowiges kontak te behou. Sedertdien geniet sy en haar gesin hierdie platform se weeklikse eredienste. Sy volg ook Stellenbosch Moederkerk se eredienste wat elke Sondag beskikbaar gestel word.

Annadene is ’n selgroepleier en sy gesels elke week met haar selgroep oor die preek se inhoud, ten spyte daarvan dat die groepslede almal provinsies ver van mekaar af is. Sy gebruik ook graag die gebruikersvriendelike skakels om die kerk te kontak, dankoffers te gee en die platform deur Whatsapp, Twitter of Facebook te deel.

Annadene voel die heel naaste aan die Here wanneer sy in die natuur is en die skepping persoonlik kan waardeer. In haar vrye tyd geniet sy dit om berg te klim, te stap en veral branderplank te ry. Boonop is sy ’n Maties-frisbeespeler!

Annadene en haar gesin is dankbaar dat KiesKerk.com destyds aan die begin van grendeltyd binne ’n week geskep is sodat gelowiges oor die land heen hulle onderskeie gemeentes kan ondersteun en kontak met mekaar kan behou.

Annadene se gesin bestaan uit haar broer, Avril, sy, haar ma, Doreen, en haar pa, Ben.

Annadene wat die afgelope Sondag op KiesKerk.com ‘n preek volg.

Annadene ry graag branderplank by Muizenberg in die Kaap.

Rotsklim by Rocklands, naby Tafelsig.

Julle stories: Elmarie Ferreira

Elmarie Ferreira en haar vriendin, Karin Beukes, het mekaar vir die eerste keer by Karin se troue in 1988 ontmoet. Toe Karin se man ’n paar jaar daarna oorlede is, het dié twee se hegte vriendskap en gesamentlike geloofspad vlamgevat. Vandag is hulle steeds onafskeidbaar, selfs al woon Elmarie tans in Centurion en Karin in Heidelberg, Gauteng.

Elmarie is ’n lidmaat van die NG Kerk Wierdapark-Suid in Centurion en deel van haar gemeente se voedingskemaprojek wat aan skoolkinders kos voorsien. Hierdie gemeente het ’n groentetuin aangepak, waarby Elmarie ook betrokke is, en ’n groot sukses daarvan gemaak.

Elmarie het van die Aftelkalender gehoor toe Karin haar daarvan vertel het. Karin se gemeente, die NG Kerk Rensburg in Heidelberg, het hierdie platform met die hele gemeente gedeel. Elmarie het besef dit is iets wat sy en haar vriendin saam sal kan geniet.

Elmarie en Karin se gunstelingdae van die Aftelkalender is dag 1 en dag 18 omdat hulle albei dit geniet om God saam te aanbid. Een van die lesse wat die Aftelkalender hulle geleer het, is dat dit niks kos om liefdevol en nederig te wees nie, veral in die uitdagende tyd waarin ons land en die wêreld tans verkeer.

Elmarie (links) en haar dogter Laetitia (regs)

NG Kerk Wierdapark-Suid se suksesvolle groentetuin

Karin (links) en Elmarie se dogter Laetitia (regs)

Karin se nagmaaltafel

Julle stories: Izelle Viljoen

KiesKerk se nuutste Aftelkalender, wat tydens die nasionale grendeltyd geloods is, se positiewe impak kring ver uit. Die Aftelkalender het kunstenaar en illustreerder Aletta Simpson geïnspireer om ’n inkleurkalender te teken wat die dae help tel – een unieke blom om in te kleur vir elke dag wat agter die rug is. Aletta is ook die kreatiewe hand agter die “Kreatiewe gebed” wat deel van dag 1-21 van die kalender was. 

Aletta se inkleurkalender het talle inkleur-fanatici, soos Izelle Viljoen, opnuut hulle kleurpotlode laat uitgrawe om hierdie tyd van inperking met ’n daaglikse dosis kreatiwiteit aan te pak.

Izelle is ’n 21-jarige student van die Paarl wat tans haar honneursgraad in Engels aan die Universiteit Stellenbosch voltooi. Sy is mal oor kitaarspeel, brei en veral lees. Sy vertel dat sy die inkleurkalender vreeslik geniet het en dat dit haar gehelp het om by te hou met die getal dae van die aanvanklike grendeltyd. Sy glo om in te kleur help om haar te kalmeer en gee aan haar brein ’n blaaskans om ’n rukkie af te skakel en slegs positief te dink.

Izelle Viljoen

Izelle se unieke inkeurkalender, wat @huisbrecht_aletta_simpson geskets het