Ontmoet Luané McLachlan

Luané McLachlan is ’n kunstenaar met vele talente. Haar vaardighede word ingespan om die Aftelkalender se visuele beelde te illustreer en nadinkvrae daaroor te skryf. Sy help ook met die vertaling van die teks in Engels. 

Meer oor Luané

Luané is in Port Elizabeth gebore en het haar kinderjare in die klein dorpie Colchester net buite Port Elizabeth deurgebring. In 2017 is sy gelegitimeer en na die NG Kerk Proteahoogte beroep. Luané vertel dat sy die meeste van haar tyd aan skets bestee. Sy beoefen digitale kuns en skilder af en toe, alhoewel sy die digitale medium verkies. Die nuutste stokperdjie wat sy in die nasionale inperkingstydperk weens Covid-19 aangepak het, is borduurwerk. Sy hoop om gou nog lap in die hande te kry! 

Kuns speel ’n baie groot rol in Luané se geloofslewe. Sy vertel dat om te skets, te skilder en te teken haar help om sin van haar verhouding met God te maak en dit uit te beeld. 

KiesKerk se impak

Luané meen KiesKerk beteken “gemeenskap” en help gelowiges om die werklike betekenis en waarde van die kerk te ontdek. Sy glo kerk gaan nie bloot oor die weeklikse samekoms van mense nie, maar oor mense wat oor Suid-Afrika heen saam vir ons land bid en hulle medemens ondersteun. Dit is om steeds God se hande en voete te wees, al is ons elkeen in ons eie huis. Luané sê gelowiges is nou God se WhatsApp-boodskappe, Facebook-blaaie en Skype-oproepe.

Dit is vir Luané ’n voorreg om deel van die Aftelkalender te wees. Sy geniet dit baie en is dankbaar dat haar gawes deur ’n groter gehoor geniet kan word. Sy hoop om aan ander kunstenaars te wys dat kuns gebruik kan word om gesprekke met God te voer of God deur jou te laat praat.

Luané en haar gesin

Luané se kunswerk

Luané se kunswerk

Ontmoet Marius Nel

Marius Nel skryf die daaglikse Oordenking wat deel vorm van die inhoud van die Aftelkalender, wat op KiesKerk.com beskikbaar is.

Meer oor Marius

Marius is in Oos-Londen gebore en was ’n teologiestudent by Maties. Hy was vir byna 20 jaar predikant in Pretoria voordat hy ’n aanbod van die Fakulteit Teologie by sy alma mater aanvaar het. Sy vrou, wat ook ’n predikant is, het op dieselfde dag ’n aanbod by Oostersee-gemeente in Parow aanvaar. In 2012 het Marius teruggekeer na Stellenbosch as ’n dosent, waar hy die vak Nuwe Testament doseer.

Marius geniet dit om in sy vrye tyd te lees, te reis, nuwe plekke te ontdek en sal ook dikwels sy gunsteling-sportspanne ondersteun.

KiesKerk se impak

Marius meen die Aftelkalender bied ’n verskeidenheid materiaal en demonstreer aan gemeentes dat die kerk meer is as bloot die eredienste. Alhoewel niks die ervaring kan vervang om die Here saam in mekaar se teenwoordigheid te aanbid nie, skep hierdie platform tog ’n gevoel van saamwees.

Vir Marius skep KiesKerk die geleentheid vir talle verskillende gemeentes om saam te kom en terselfdertyd ’n boodskap uit dieselfde materiaal te kry terwyl almal dieselfde uitdagende omstandighede ervaar – en dit is werklik waardevol. Marius sien hoe gelowiges weer die kans kry om hulle geloof met hulle onmiddellike gesin en uitgebreide familie te beleef en te deel – iets waarvoor ’n mens voorheen min kans gekry het.